නත්තල

                       

                  සෑම වර්ෂයකම දෙසැම්බර් මස 25 වැනි දින නත්තල ලොව පුරා කිතුනු බැතිමතුන් විසින් හා ඇතැම් වෙනත් ආගම් වල ජනතාව විසින්ද සමරනු ලබයි. ඇමරිකා එක්සත් ජනපදයේ ජනතාවගෙන් 96% මෙම උත්සවය සමරන බව වාර්ථා වේ. නාසරෙත්හි ජේසුස් වහන්සේගේ උපත සැමරීම මෙහිදී සිදුකරන කාර්ය්‍යයි. මෙම දිනයන්හීදී ක්‍රිස්තියානි දේවස්ථාන වලදී නොයෙකුත් උත්සව පැවැත්වීම, ගේ දොර සැරසීම, නත්තල් සීයාගේ ආගමනය සිදුවේ. මෙම කාලසීමාවේදී සැන්ටා ක්ලෝස් (Santa Claus) හෙවත් නත්තල් සීයා කුඩා ළමුන් අතර ජනප්‍රිය චරිතයකි. නත්තල් කාල සීමාව තුළදී තෑගි එන ඒම වෙනුවෙන් ඔවුන් ප්‍රසිද්ධ වන අතර, පුරාණයේ ජීවත් වුනු සාන්ත නිකලස් (St. Nicholas) හා ක්‍රිස්තියානි විශ්වාස වලට අනුකූල ව සෑදුනු චරිතයක් බවට විශ්වාස කෙරේ. මොහුගේ වර්ථමාන හැඩ රුව 19 වැනි සියවසයේදී සිදුවී ඇත.

                        සිහිපත් කිරීම, කිතුනු බැතිමතුන් නත්තල සමරන ප්‍රධාන මාර්ගයකි. ජේසු තුමන්ගේ උපන් දිනය උදාවන තුරු සූදානම් වීමේ කාලය තුල, විවිධ ආගමික කටයුතු වල නිරත වේ. කුඩා ළමුන් මෙන් ම වැඩිහිටි කිතුනු ජනතාව ද ක්‍රිස්තු තුමන්ගේ උපත සිහිපත් කෙරෙන නාට්‍ය රඟ දැක්වීමේ සහ නත්තල් ගීත ( Christmas Carols) ගායනා කිරීමේ කටයුතු වල නිරත වෙති. සමහර නිවෙස් වල ජේසු තුමන් ඉපදුණු ගවලෙන සහ අදාල චරිත කලාත්මක ප්‍රතිරූප වලින් නිරූපණය කෙරෙයි. මෙම ප්‍රතිමා අතර ජේසු තුමන් බැලීමට පැමිණි "රජ තුන් කට්ටුව" වැදගත් වේ. ඔවුන් "බෙත්ලෙහෙමේ තරුව" නමින් හැඳින්වෙන තාරකාව පසුපස පැමිණ, ජේසු තුමන් වෙත "රත්තරන්, සුවඳ ලාටු සහ සුවඳ දුම්" පුද කර ඇත.

වචනාර්ථය.

                       Christmas (ක්‍රිස්මස්) යන වචනය නත්තල යන්නෙහි ඉංග්‍රීසි යෙදුම වන්නේය. මෙහි අර්ථය ලෙස දැක්විය හැක්කේ "ක්‍රිස්තු තුමන්ගේ පූජාව " යන්නයි. එසේම ඇතැම් අවස්ථාවන්හී දී Christmas යන්න Xmas ලෙසද භාවිතයේ දක්නට ලැබේ.

ජේසු උපතට පෙර පරිසරය

                           ජේසු තුමන්ගේ පහලවීමට පෙර සිටම ලොව පුරා දෙසැම්බර් මාසය තුළ උත්සව පවත්වා ඇති බව ඉතිහාසය පිරික්සීම තුළින් ගම්‍යමාන වේ. මෙම උත්සව මෙකල පැවැත්වීමට විශේෂ කරුණු පාදක වු බව සිතිය හැක. එනම් ශීත කාලයේ දී ගොවිතැන් කටයුතු අඩු වීම සහ උතුරු අර්ධ ගෝලයේ පවත්වනු ලබන ශීත සෘතු සූර්යනියුක්තියෙන් පසු ජනතාව විසින් දීර්ඝ දිනයන් මෙන් ම කෙටි රාත්‍රියන් ද බලාපොරොත්තු වීමයි. එසේම මෙම උත්සව කාලයේ සිදු කළ කටයුතු සමහරක් නම් රෝමානු උත්සවයකින් (Roman Saturnalia) පැවත එන තෑගි බෙදා දීම සහ සිනහ උපදවන ක්‍රියා කිරීම; රෝමානු අලුත් අවුරුද්දෙන් පැවත එන අලංකාර තුරුලිය, ආලෝක පහන්, පින් කටයුතු; ජර්මානු උත්ස‍වයකින් (Teutonic Feasts) පැවත එන යූල් කොට (Yule Log) සහ විවිධ ආහාර වර්ග යි. 

                      එසේම ඉහත චාරිත්‍ර ක්‍රමයන් ‍සෑදි ඇත්තේ නොයෙකු සීත ඍතුවේ උත්සව පාදක කොටගෙන බව සිතිය හැකිය. ඒ බව පහත උත්සව පිළිබදව විමසීමෙන් පැහැදිලි වේ.

 ඩයිස් නැටාලිස් සොලිස් ඉන්වික්ටි ( Dies Natalis Solis Invicti)

                           "ඩයිස් නැටාලිස් සොලිස් ඉන්වික්ටි" යන නමින් උත්සවයක් දෙසැම්බර් මස 25 වැනි දින රෝමානු ජාතිකයින් විසින් පවත්වා ඇත.  මෙම නමෙහි තේරුම නම් "අපරාජිත හිරුගේ උපන්දිනය" යන්නයි. මෙහි ඇති "සොල් ඉන්වික්ටස්" යන යෙදුම නිසා සිරියානු හිරු දෙවියෙකු වන එලා ගේබල් (Elah-Gabal); ඕරලියන් අධිරාජ්‍යයාගේ (Emperor Aurelian) දෙවියන්; පර්සියානු සම්භවයකින් යුත් මිත්‍රාස් (Mithras) නම් වූ සොල්දාදුවන්ගේ දෙවියන් වැනි හිරු දෙවියන් රැසකට වන්දනා කිරීමේ හැකියාව පවතී.

                            ශීත සෘතු සූර්යකාන්තිය බිඳ වැටුණු දිනය ලෙස එකල දෙසැම්බර් 25 දිනය සලකා තිබේ. වර්ථමානයේ මෙය දෙසැම්බර් 21-22 වැනි දිනයකට යෙදී ඇත. එසේම බොහෝ ක්‍රිස්තියානි කතුවරුන් සූර්යාගේ මෙම නැවත ඉපදීම ජේසුස් වහන්සේගේ ඉපදීමට සම්බන්ධ කොට ඇත.

යූල්

                         මිථ්‍යාදෘෂ්ටික විශ්වාස වලින් යුත් ස්කැන්ඩිනේවියාව, දෙසැම්බර් මස අග සිට ජනවාරි මස මුල දක්වා යූල් නමැති ශීත සෘතු උත්සවයක් පවත්වා ඇති බව වාර්ථා වේ. මෙම උත්සවයේදී  දී යූල් කොටන් ගිනි දල්වා ඇති අතර ඒවා "තෝර්" නමැති ගිගුරුමේ දෙවියන් (God of thunder) හට ගෞරවය පිණිස සිදුකොට ඇත. එසේම ඔවුහු තවමත් නත්තල් උත්සවය "යූල්" නමින් හදුන්වනු ලබයි.

                      මෙසායා නැතහොත් තෝරාගත් තැනැත්තා නමින් හදුන්වනු ලැබු ජේසුස් වහන්සේ උපත ලැබුවේ "මරිය තුමිය" නැමැති කණ්‍යාවගෙන් යැයි කිතු භක්තිකයන්ගේ විශ්වාසයයි.  එසේම මෙම නත්තල් කථාව "ලූක්" සහ "මතෙව්" යන බයිබල් කතුවරුන්ගේ අනුශාසනා මත බිහිවුවක් බව සදහන් වේ. ඒ අනුව ක්‍රිස්තුන් වහන්සේ බෙත්ලෙහෙම් නුවර දී මරිය තුමියට සහ තම සුරැකි පියා වන ජුසේ තුමාට දාව ඉපදුනු බව කියවේ. මෙහි ප්‍රචලිත කථාවට අනුව එතුමන් ගව ලෙනක ඉපදුන බව කියැවුනත් එය බයිබල් අනුශාසනා වලට අනුව ගව ඔරුවක දී (manger) සිදුවී ඇත.ආදි කාලීන ප්‍රතිමා ශිල්පයට අනුව මෙම ගව ලෙන හා ගව ඔරුව එකම ස්ථානයක පැවතුන බව දැක්වේ. එසේම මෙය එය අදටත් බෙත්ලෙහෙම් නුවර දේවස්ථානයට පහළින් පිහිටා තිබේ. තවද දේවදූතයකු විසින් මෙම ගවලෙන අසල සිටි එ‍‍ඬේරුන්හට ජේසුස් වහන්සේගේ උපත ගැන පවසා තිබේ. මෙම පිරිස ජේසුතුමන් බැහැදුටු පළමු පිරිස ලෙසද හැදින්වේ. ජේසු තුමන්ගේ උපතත් සමග අතිතයේ සිට තිබූ අනා වැකි බොහෝමයක් සුදු වූ බවද ප්‍රකාශිතය.

නත්තල් සීයා

                          මෙය වර්ථමානයේ පවා කවුරුත් හොදින් හදුනන චරිතයකි. මොහු කුඩා දරුවන්ගේ සිතෙහි සැරිසරන ආදරණිය චරිතයක් වේ. මෙම චරිතය බටහිර සංස්කෘතිය මගින් පැවත එන අතර නත්තල් සීයා (නත්තලේ පියා, සාන්ත නිකලස්, සින්ටක්ලාස්, ක්‍රිස් ක්‍රින්ගල්, පියේර් නොයෙල්, බැබෝ නටාලේ, සාන්ත බැසිල්, ෆාදර් ෆ්‍රො‍ස්ට් යන විවිධ නම් වලින් හැදින්වෙන) නමැති චරිතයට ආරෝපිත කර ඇත. මෙම නත්තල් සීයාගේ ප්‍රතිමූර්තිය නිර්මාණය කොට ඇත්තේ ජර්මන්-ඇමරිකානු ජාතික චිත්‍ර ශිල්පී "තෝමස් නාස්ට්" (1840-1902) විසිනි. 1863 පටන් මෙම රූපය සෑම වසරකම වෙනස් වූ අතර වර්ථමානයේ අපට දිස්වන රූපය 1880 දශකයේ දී නිර්මාණය කොට ඇත. එසේම මෙම රූපය 1920 දී ප්‍රචාරකයින් විසින් ප්‍රමාණ කර තිබේ. නත්තල් සීයා‍ට පෙර පැවති චරිතය, එනම් නත්තලේ පියා, 15 වන සියවසේදී වාර්තා වී ඇති නමුත්, එම චරිතය සිනහ උපදවන සහ බීමත්කම සමඟ සම්බන්ධ වී ඇත. බ්‍රිතාන්‍යයේ වික්ටෝරියා රැජින‍ගේ කාල වකවානුවේ දී එම චරිතය වර්තමාන නත්තල් සීයාගේ චරිතයට පරිවර්තනය කර ඇත.ප්‍රංශ ජාතික පියේර් නොයෙල් ගේ චරිතය ද මෙලෙස පරිණාමනය වී ඇත. ඉතාලියේ දී බැබෝ නටාලේ නම් තැනැත්තා නත්තල් සීයා ලෙස පෙනී සිට ඇත. එසේම මෙම නත්තල් සීයාගේ සහායකයන් ලෙස "මිට්ටන්" හදුන්වන අතර ඔවුන් විසින් මෙම තෑගි සාදා ඇත. 

නත්තල් ගස

                                 නත්තල් උත්සවය සමගම බැදී පවතින තවත් සුවිශේෂී ‍අංගයක් ලෙස නත්තල් ගස හැදින්විය හැකිය. වර්තමාන නත්තල් ගසේ සම්ප්‍රදාය 18 වන සියවසේ දී ජර්මනි‍යේ දී ආරම්භ වී ඇති බවට විශ්වාස කෙරේ. නමුත් 16 වන සියවසේ දී එය "මාර්ටින් ලූතර්" ආරම්භ කල බවට සමහරු තර්ක කරති. 

නත්තල් මුද්දර

                            මෙයද නත්තල් සමයේ සුවිශේෂී අංගයක් ලෙස හැදින්විය හැක. මෙම මුද්දර සාමාන්‍ය තැපෑල සදහා එම අවුරුද්ද පුරා වලංගු වන ලෙස තනා තිබේ. මෙය ඔක්තොම්බර් මස මුල සිට අලෙවි කිරීම සිදුවේ.1898 දී ඉම්පීරියල් පැන්ස තැපැල් ගාස්තුවේ (Imperial Penny Postage Rate) ආරම්භය සංකේතවත් කිරීම සඳහා කැනේඩියානු මුද්දරයක් නිකුත් කර ඇත. මෙම මුද්දරයේ ලෝක ගෝලයේ සිතියමක් පෙන්වා ඇති අතර "XMAS 1898" ලෙස අභිලේඛනයක් ද එහි පහල අඩංගු වේ. 1937 දී ඕස්ට්‍රියාව "නත්තල් සුභ පැතුම් මුද්දර" (Christmas greeting stamps) දෙකක් හඳුන්වා දී ඇත. එම මුද්දර වල රෝස මලක් සහ රාශි චක්‍රය නිරූපණය කෙරේ. 1939 දී බ්‍රසීලය විසින් අර්ධ-තැපැල් මුද්දර හතරක් නිකුත් කර තිබේ. රජ තුන් කට්ටුව සහ බෙත්ලෙහෙම් තරුව, දේවදූතයා සහ දරුවා, දකුණු කුරුසය සහ දරුවා, සහ මව හා දරුවා යන තේමාවන් මෙම මුද්දර වල අඩංගු වේ. ඇමරිකා එක්සත් ජනපදයේ තැපැල් සේවය (The U.S Postal Service) මගින් සෑම වසරකදී ම ආගමික මුද්දරයක් සහ ලෞකික මුද්දරයක් නත්තල උදෙසා නිකුත් කෙරේ.

නත්තල සමග සිදුවන අන් සිදුවීම්.

                              නත්තල සමග සිදුවන බොහෝ සිදුවීම් ඇත. ඉන් ප්‍රධාන දෙය පරිසරය සැරසීම් ආදියයි. එසේම වෙළද ආයතන මගින් සිදුකරනු ලබන නිපැයුම් බොහෝමයක් නත්තල පාදක කොට නිපදවීම මෙකල ඇති තවත් සිදුවීමකි. තවද බොහෝ භාණ්ඩයන් ඉතා අඩු මිල ගනන් යටතේ අලෙවි වීම ජනයා හට ලබා දෙන තවත් නත්තල් තෑග්ගක් ලෙස හදුන්වාදිය හැක. එසේම මෙම නත්තල් උත්සවය ලොව පුරා වැඩිම පිරිසක් සමරන උත්සවය ලෙසින්ද සදහන් කළ හැකිය. 

                          මෙම නත්තල පිළිබදව සදහන් කළ ලිපියට ප්‍රධාන වශයෙන් කරුණු සපයාගනු ලැබුවේ "විකිපීඩියා, නිදහස් විශ්වකෝෂය" වෙතිනි. ප්‍රථමයෙන් ඒ සදහා මා එහි සියළු කතුවරුන් වෙත ස්තූතිය පුද කර සිටිමි. මා ‍විසින් මෙම ලිපිය ලිවීම තුලින් අදහස් කරනු ලැබු‍වේ පාඨක ඔබේ දැනුමට මේ පිළිබදව අළුත් යමක් එකතු කිරීමේ අභිලාෂයෙනි. මෙම ලිපිය මගින් ඔබ හට කිසියම් වූ යහපතක් සිදුවෙතැයි මා අපේක්ෂා කරමි. ඔබේ අදහස් අප වෙත දන්වන්න. ඔබ සැමට ස්තූතියි!